كل الأمور أتلخبطط ومعدش نور مفيش مرور مفيش دخول طب روح شمال طب روح يمين / عسكر شمال عسكر يمين كل الأمور أتلخبطط / ممنوع عليكوا يا جائلين تبيع عنب ولا حتى تين / عارف مين سااكن هنا دا يبقى مين / هو ده أدم الهنا والفقر جالكوا يا فلاحين / هو ده شبل الأسد يا شحاتين / دا حط قدمه فى البلد قول سلام رحمن رحيم / كل الأمور أتلخبطط ما بين أشاعه ما بين بتاعه خلاص دا مات / راح الوجوم وأتبسمت كل الوجوه وفى عز فرحك يا مصرى / طلعت أشاعه وعميت بصيرتك ومشيت تخبط فى البيبان / مين حيفتح كلهم سكه واحده كلهم سكه لومان / كل الأمور أتلخبطط والناس تعود تكلم نفسها يا حظها / وتقول دا مات أو يمكن حتى بيحتضر / طلعت أشاعه / منحوس يا مصرى أنت وبلدنا حا تعيش حالات / وكأن مكتوب علينا الهموم مش عارف أعوم / كل يوم غرقان ف عرقى جوه الهدوم / والحزن كاسى سحنتى وغنايا موال ألم يا وكستى يا نيبتى/ وبقيت أعدد زى الولايا / خلاص بقى يا حظ قوم كل الأمور أتلخبطط ما بين ندم وما بين هموم / ما فيش فرح يا ناس يأست حاموت خلاص م العفن / مليان عرق من غير حموم جوه الهدوم من غير كفن / يمكن يقولوا مات شهيد مات بطل فقران غرقان من غير هدوم / كل الأمور أتلخبطط خلاص غرقت مش عارف أعوم حد يرمى حبل يشدنى أنا المصرى خلاص غرقت فى الهموم
معلم فحمه ....
ليست هناك تعليقات:
إرسال تعليق