كل ما أقوم م النوم أنام تانى

كل يوم أقوم م النوم أنام تانى أمسك جنابى ألقى جنابى مألمانى كل عظمى مكسر وركبى وجعانى وودنى خلاص أنسدت م السمع يانى كل هموم الزمن أتجمعت ومحصرانى فقر وبطاله وفساد ليه كده يا زمانى ودستور نحاول نعدله يعوجوه تانى رحت لطبيب مداوى يكتبلى دوا تانى قالى دواك مش هنا ولا هنا عنوانى عايز تخف م الوجع وميرجعش الألم تانى سد ودنك م اللى بتسمعه كليبات وأغانى سيبك م اللى يقول يا حمار وهيفا وآه يانى وعيش أسبوع ما تشفش صورة الريس وأنسى كلامه وطلته وأسمع حليم من تانى حتلاقى نفسك شفيت ورجعت شباب من تانى ***************** يامصر يا صابرة على الزمن واللى أتجوزوكى لو كان يعرفو قيمة عظمتك لأنحنوا وأحتراموكى ألأصول يسألوا على ألأصل وبعدين يخيروكى أشرفلك تطلقى ماللى ما قدرك وترجعى بيت أبوكى ***************** يا شايل هموم الناس والزمن مين يشيل همك عايش دنيتك فى حب الناس ولا شىء همك الظهر تتغدى ومن غير عشا تنام ولا يهمك تعيش تدافع عن حياة الناس وتموت مع همك ***************** عجبى على بنت ناس أصيلة باعوها لخسيس من اول بداية الطريق أنكشف و بان الخسيس من بعد عزة نفس وكرامه حب يوطيها الخسيس بكرة يتبدل الزمن تفضل هى أصيله ويموت هو خسيس ***************** يا عم يا اللى صارف فلوسك على الحشيش ليلا تى وتقول أصل كيف المزاج بينده علي اللى زى يا آتى يا عم كيف مراتك والعيال بيناموا فى الهموم ليلا تى لو كان كيف المزاج بيفيد كان خلى ألأعمى ساعاتى ***************** أيه يفيدك يا مغرور لما على الناس تتعالى وكل واحد يدعوك تجيله تقوله لا أنت تعالى النهار ده كله ليك وبكرة الناس عليك تتعالى لو كنت عارف إن الزمن غدار ما ف يوم تتعالى ************** يا مصرى يا شارب الهم والغم وبايت فيه نفسى فى يوم يفرح ويبتسم والخير يجيه كريم بشوش وأبن نكته وقلبه الحزن ماليه سنين عايش مآسى وصابر أتكلم ساكت ليه ************ www.dastor.net omran55.blogspot.com omran55.maktoobblog.com

ليس العيب فى مبارك..............يا سلام

ليس العيب فى مبارك.........يا سلام العيب كل العيب فى الراجل اللى بيوصل نبض الشارع للرئيس لأن مبارك راجل بيحس وبيشعر زى كل أنسان وراجل عنده زوق ودم لأن لو هذ الرجل قاله يا ريس الشعب مريض وتعبان وحاله ما يسرش كان الريس قدم أستقالته ولو أن هذا الراجل قاله يا ريس البلد أتملت بطاله وفساد ورشوة وتسيب كان الريس قدم أستقالته ولو أن الراجل قاله ياريس حالة التعليم ما تسرش والفقر ذاد عن حده كان الريس قدم أستقالته ولو أن الراجل قاله يا ريس أن الشعب فاض بيه وعايز يغير الدستور كان الريس قدم أستقالته لأنه راجل بيحس ويشعر بنبض الشارع وعنده دم لكن الراجل فى الحقيقه بينقل صورة مغايرة للأحداث وبقوله الشعب بيحبك يا ريس الناس كلها أتعشت ونامت والعيشه معدن وكل البلد صحتها كويسه فلذلك أنا بقترح على الريس أن يتخفى وينزل ألى الشارع ويسمع بودنه ويشوف بعينه الناس بتقول عليه أيه بس المهم ما حدش يعرف شخصيته ومن باب ألأحتياط ياخد حرس زياده ويقفوا قريبين منه لأن الناس لو عرفته أنا مش مسؤل على اللى بيحصل عل وعسى يجى الفرج ******************* www.dastor.net omran55.blogspot.com omran55.maktoobblog.com

حتى أنت يا أبو النجوم

حتى أنت يا أبو النجوم 25 سنه مرت من عمرنا ونحن فى الواقع نحسها وكأنها قرن من الزمان إلا إن غصه القلب وسوء فترة الحكم تجبر المرء على أن يحتفظ بأشياء مره فى حلقه ومثبته فى ذاكرتة وذاكرة تاريخ مصر 25 سنه ذهبت والجراح لازالت تتفتح وترفض أن تلتئم جراح ملايين من قلوب المصريين توجعت ومثلهم يندبوا حظهم العاثر وملايين العيون تبكى نصيبهاا وتشكوا لله أمرها وبعد تلك المآسى تأتى الرياح بما تشتهى ألأنفس فقد طالعنا الدكتور /عادل عبد الرحمن صاحب نظرية ألأكواد الرقمية والملقب ب أبو النجوم والتى أشارت له بأنه سيحدث تغيير وزارى لأربعة وزراء فى مصر ولم تمس تلك النظرية حسنى مبارك وولده قد ايه القسوه شديده علينا حتى فى البخت والطالع ألأمر لله ...كذب المنجمون ولو صدقوا ما بين طرفة عين وأنتباهتها يغير الله من حال الى حال *************** يا كاشفه الغيب والبخت فى الفنجان شوفيلى الطالع طريقى كله حفروسدود وحواجز وواقـــف مش طالع قالتلى العرافه قدامك سكه سفر تمشى وتعبر وتطالع أول كيلو متر سقط فى حفرة وقالوا مات ومش طالع *************** www.dastor.net omran55.blogspot.com omran55.maktoobblog.com

لو ظهر هلال رمضان وأحنا فى وقفه عرفه نصوم ولالاء

يا أهل مصر مشايخ قساوسه مثقفين معارضين عمال فلاحين طلبه أطباء مهندسين مصر تتفكك وسنفقد مقومات الدولة وسنصبح فرق وقبائل لو لم نأخذ مبادرة جاده لأيقاف مسلسل الفساد ومهزلة التوريث والنظر الى فجر جديد لمستقبل مصر كلها وهذه دعوة للتنسيق بين احزاب المعارضة والحركاته المصرية الساعية الى المستقبل للقيام بعمل أعتصام الجمعه وشل حركة مصر كلها لمدة ساعتين أو من بعد صلاة الجمعه الى صلاة العصر نعتصم على ارصفة الشوارع العمومية القريبة من منازلنا بدون عنف مع كتابة مطالبنا ليراها العالم كله والتى فيها خلاصنا كلنا وضمان مستقبل أبناءنا والتى تنحصر فى ثلاث بعدها نفكر فى الباقى ************ أنتخاب رئيس من بين عشرة مرشحين قصر مدة الرئيس على مدتين فقط عدم ترشيح أقارب الدرجة ألأولى قبل أنقضاء مدة قانونية على ترك الحكم ********** هذه المطالب لن تجعل فى مصر فساد ولا سرقة ولا عدم تنفيذ خطه ولا راجل يحكم ويصاب بجنون العظمه وسوف تتضح أمور الظالم أولا بأول قبل أن تتفاقم المشاكل وتزيد بعدها يتم أعادة صيغة الدستور المصرى ليتوافق مع هذا العصر ************ أرجوا تحديد الجمعه عن طريق التنسيق بين الحركات المعارضه وأحزاب المعارضة وحركه كفاية ********** مش كفاية أنك تقول للغلط..........بس كفاية مش كفاية أنك تقول للناس........خليك معايا مش كفاية أنك تقول للظالم..........ليك نهاية مش كفاية أنك تقول لكل حر........ردد غنايا مش كفاية أنك تقول للكل لا........ بس كفاية الكفاية أنى أوضع حد ..............لكل نهاية الكفاية أنى أنظم مسيرة........وملايين معايا الكفاية أنى أقوله أرحل.............دى البداية الكفاية أنى أقول للوطن .........عينى ومنايا الكفاية انى أقول كلنا..............حركه كفاية ************* لا تنسوا ثورة الرصيف ***************** www.dastor.net omran55.maktoobblog.com