بكره ييجى ولا ما يجيشى .....

بكره ييجى ولا ما يجيشى
كل يوم بنسمع عليه
لما بقيت زيه ما نويشى
ولو بكره جه
تشوفه ف بلدنا
...صبية ملفوفة بعلم
ملون بتلات ألوان
ونسر دهبى شامخ
على بيبانها سهران
لقبها
على مر التاريخ
ما طالوش
عنتر ولا بنى خيبان
ولا سيوف بنى يزن
ولا رماح هكسوس
ولا بلاد عجم
ولا تتار خان
واقفة شامخة
بين البلدان
لكن يا ولداه
دار الزمان
ووسوس الشيطان
قالها أتجوزيه دا
همام
بيركب الهوا وسايق فيها تمام
همام
طلع مالوش أصل
فى كتب التاريخ
ولا الجغرافيا
ولا ف خيم عربان
الشابة من يوم ما عرفت
دبلت
والفكر صابها
مش عايزة صدقه
أو حسنه
دى بس طالبه
من ولادها
وقفه
أو مظاهرة
أو أعتصام
جامعة القاهرة أسكندرية
أو حلوان
عمال مصانع أو فلاحين ف غيطان
او حتى شوية هنود
ولا
ناس من الأروام
يا كده يا تطلعوا عليها
بحزمتين صبر
وشريك
وتورتين بلح أبريمى
أو عجوة
لو مفيش
يبقى تمشى فى الجنازة
معاك قزازة
تحط فيها شوية
رماد من ثراها
وتبقى تقرأ عليها
فاتحه أو قداس
يوم وفاتها
ولا تلقى عليها نظره
قبل ما نوارى
رفاتها
تحت التراب
وبدال ما تبقى
للدنيا أم
بكرة تسمع
أخبارها وارده
بلاد مجاعة بلاد خلاعه
تطاطى راسك
ف وسط ناسك
وتعيش همومك جوه ف هدومك
وبدل ما تندم
كان يجرى آيه
لو كنت قمت
وضربت راسك
فى أى حيطه
قبل الطوفان
كان يجرى آيه
لو قلت لاء
بس لاء
كلمة واحده بألف حق
فى وش ظالم
مرة واحدة قبل ما يورثوها
قوله لاء
تورثوها بأى حق
-----------
معلم فحمه ........
.

__________________

بحبك وبعشق المجاريح ... و دايب فى الغرام عشرة ... مجذوب ... و غاوى عشرة التباريح .... و أجمل ما فيكى الجيرة والعشرة !!!

...معلم فحمه