WorldTimeServer Clock

Cairo

الاثنين، 25 أكتوبر 2010

وطنى .....2


وطنى
لو كنت أسم
يبقى انت كل الأسامى
لو كنت كلمه
يبقى أنت كل كلامى
لو كنت نظره
تبقى أنت كل عيونى
يا دم سايل فى الوريد
متفرع فى شرايينى
يا شجرة متفرعه
جزورها ممدوده فى طينى
يا نبض قلبى
دقاته
هى طبولى
ياوطن الحزن والفرح
يا وطن القلب اللى أنجرح
من غير ميعاد
جواك أعيش ألفرح
يا وطن الميلاد
ضاقت قلت
أسافر
أطير فوق السحاب
من غير معاد
أروح لوجع البعاد
قدر
انكتب علينا و عاد
ونصبر على المقسوم
وأسألك يا نفسى
لو كان عليا ذنب
أتوب وأعود
تجاوبنى نفسى
القسمه والمكتوب
اليوم
حرم عليا المنام
ولا أدفن راسى فى الرمل
ولا أعيش نعام
ولا عمرى أقول للظالم
نعم
ولا احلم ف المنام
اليوم
ندر عليا يا وطن
أحكى قصتك
كل يوم ع الشات
بشهود عيان
وشهود أثبات
وأنده مطرح ما رجلى
تروح
باأعلى صوت
يا وطن مجروح
أنده بصوت مبحوح
من اللى حاكمينك
ومتنصابين سلاطينك
يمكن يكون فيه ناس
تسمعك
فى ليل السكون
من وسط المقابر
من رحم الميتين
يمكن
يتولد لنا ناس تانيين
يكون فيهم ناصر 52
ولا سعد 19
أو مصطفى 36
ولا عرابى الزعيم
ولا حتى نتجمع كلنا
لوحدنا
وقفة يناير
لما دارو مصر كعب داير
أفكرك يا مصر
لما يومها الشعب قام
من أسكندرية لجنوب أسوان
وعمال المحلة
وأخوانهم فى حلوان
والجامعة
عين شمس واقفة جدعه
والقاهرة
عامله أعتصام
كان يوم أرادة
أنكسر ظهر النظام
النهارده يا وطنى
بدل ما تكون وطنى الحبيب
خلاص
بقيت وطنى البعيد
وطن السلاسل والحديد
وطن الأسلاك الشائكه
وطن المشانق والمحاكم
وطن العبيد
وطن الوسية
النهارده يا وطنى بقيت
وطن الحواجز والسدود
لكن يا وطنى
بكره نعود
نطير فوق السحاب
وتانى نعود
لكن تبقى أنت يا وطنى
دم سايل فى الوريد
شجرة
فروعها شرايينى
وجزورها مغروزه فى
طينى
----------------------


معلم فحمه .....

.
.
__________________