॥دوار يا زمن دوار/ دلوقتى ليل وبكره يطلع عليك نهار / مهما عليت يا ظالم وظلمك بقى انهار / ولبست ثوب الملك وحكمت بجيش جرار / نصيحه منى يا ظالم الملك لله والزمن غدار....عجبى
معلم فحمه ....
الاثنين، 21 سبتمبر 2009
يا ريس مين يورثك ..
॥يا وارث مــين يورث كـنوزك بعد الموت / تــملك وتحكـم بيميـنك ظانن أنك عايش ومش حا تموت / ولما يجيـــــلك الملك / تعرف إن دى النهاية ترتجف وينقطع أجلك م القوت / تستغفر وتطلب التوبه لاكن بعد آييه خلاص يا ظالم جالك الموت ...سبحان الله
معلم فحمه ....
بتحب آييه يا ريس ...
॥تحـــب ايه يا ريس زمانك الحرنكــش ولا التين / مصــر خلاص ضلمه وساكنها غراب البين / آه لو الشعب قام وأحيا علوم الدين / ونفذوا حد الحرابه عليك / لا حايحميك حكم ولاحرس ولا قصور عابدين .... سبحان الله
معلم فحمه ....
يا هزة وسط البلد ..
يا هزه وسط البلد /ومجمعــه الحته / وكشف كل حاجه ومبينه الجته / بدلتك متفتقه ستميت حته / من بعد ما أتعرينا والفقربقى عفه / ماله الحجاب يا ناس نعمه وبيستر الجته
معلم فحمه ....
دقيت على الأبواب ...
دقيت على الأبواب اشكى من الوجع اللى فيه / كبد مريض بالفيروس من ضغط ايامى الآسية / وغسيل كليه لقلب معلول ونظر ضعيف 6 على 100 / سألونى ايه رأيك ف الريس / تمام بس شوفوا الوجع اللى فيا
معلم فحمه ...
يا قايل كلمة الحق ..
॥يا قايل كلمة الحق بصوتك قولها واتفانا فيها / وأنده فى وسط الناس و فى الأسواق واحكيها / واوعى تظن ان الظلم يوم يقدر عليها ويفنيها / فى يوم حا تشيلك الناس على الراس لو فهموا معانيها
معلم فحمه ....
صياد وراح يصطاد
صياد وراح يصطاد من سوق الخضار كوسه / رمى الشبك اتشبك فى القرع وهربت الكوسه / علشان صياد فقران ملا الشبك خضار مفهوش ولا كوسه / ياللى انت رايح تصطاد اعتمد على الله وسيبك من الكوسه...عجبى
معلم فحمه ....
يا عينى عليكى يا مصر ..
ياعينى عليكى يا مصر / وأنتى بتتألمى من غير صوت / قومى مره أصرخى / قبل الحياة ما تفوت / وتيجى النهاية / ونندم مهما نندم ونصرخ مهما نصرخ / ساعتها / آييه يفيد الصراخ بعد الموت
معلم فحمه ...
قالو القمر فى السما
قالوا القمر فى السما وكل النجوم بيضه/ زى وشوش البشر ماشية على الموضه / مره تكون صادقة ومرة تكون عوجه / أزاى تفرق يا قلبى فى الزمن ده / بين قلوب طيبه وبين قلوب سوده ...
معلم فحمه ......
قول يا بحر ...
قول يا بحر الله وأحكى / دا بحر الله ما يكذبشى / الموج يقلب فى بطنك ليل نهار ولا يهمدشى/ وأنت يا بحر لا يوم تقول آه ولا يوم تشكى / يا ريتنى يا بحر مثلك ماأولش آه ولا أبوحشى / لاكنى واحد م البشر / أول ما يجينى مغص اصرخ ولا أسكتشى
معلم فحمه ...
الفرق بين أبو تريكه ومبارك ...
** الفرق بين أبو تريكه ومبارك أبو تريكه بيجيب أجوان لمصر ويفرح الناس
ومبارك بيجيب مصايب لمصر تزيد هموم الناس ....
معلم فحمه ....
يا رب ....
يا رب يا صانع الحب فى نفسك وعند الناس / الكره بزرة خبيسه طرحه صناعة الناس / فيه راجل بفضلك تحبه ويحبه كل الناس / وفيه راجل مهما عمل خلاص بيكرهوه الناس ... عجبى
معلم فحمه ...
وطنى ......
وطنى أنا بعشقك عشق الليالى المستحيله / أنا بعشقك زى القمر لما يعشق السما بعيون كحيله / أنا بعشقك وأنت خريف مهموم / أنا بعشقك وأنت ربيع مجنون / أنا بعشقك وبغنيك ع السمسمية/ أنا بعشقك والمجرمين مرشقين الشارع عسكر ونازلين ضرب فيا
معلم فحمه ...
الاشتراك في:
الرسائل (Atom)